Ren Qing: Paano ka makikilala ng ibang tao?

Ito ang paborito kong Chinese character. Nakuha ko ito sa isang kaibigang Intsik na nag-aaral din dito at nakilala ko sa isang poster session ng aming research school. Napag-usapan kasi namin kasama ng isa pang estudyanteng Intsik na bago pa lang dito ang tungkol sa sitwasyon nya sa kanyang opisina partikular kung paano sya pakitunguhan ng kanyang mga katrabaho. Ang pagkaalala ko ay parang hindi nya gaanong gusto kung paano sya pakitunguhan nila. Nabanggit ko na dapat syang sumama sa araw-araw nila na coffee break kahit pa hindi sya mahilig magkape kasi isang pagkakataon iyon na makilala nya ang kanyang mga katrabaho at makikilala din sya nila. Sabi ko na maaaring magbabago ang pakikitungo sa kanya ng mga katrabaho nya kung siya din ay mas makilala nila. Sumang-ayon naman ang isang Intsik at binanggit itong "ren qing" at pinasulat ko sa kanya ang karakter nito. Kung tama itong intindi ko, ang "ren qing" daw ay yung personalidad ng isang tao na malalaman lamang ng iba kapag lagi siyang nakikisalamuha nila.

Magpasalamat tayo sa mga magsasaka

Sa Pilipinas, marami sa mamamayan ay nagdadasal bago kumain. Sa mga taong madasalin, sa susunod ay huwag nating kalimutang magpasalamat sa mga magsasaka na siyang nagbanat ng buto para lang may aanihin na siyang kakainin natin. Ang malungkot nito ay kalakhan ng lupa sa bansa ay pagmamay-ari ng iilang pamilya lamang, samantalang ang mga magsasaka ay nananatiling walang lupa at hawak sa leeg ng mga nagmamay-ari ng lupa o yung mga tinatawag na panginoong maylupa (landlord). Karamihan ng mga magsasaka sa Pilipinas ay nagugutom, baon sa utang, at hindi kayang pag-aralin ang mga anak.

Sa susunod na dasal, pasalamatan natin ang mga magsasaka. Sa susunod, ipagdasal din natin na magkaroon na sila ng sariling lupang sasakahin. Higit pa sa dasal, makiisa tayo sa kanilang pakikibaka para sa tunay na reporma sa lupa.

Paano ba gumawa ng bagong uri ng nilalang?

Simple lang. Magculture ng yeast. I-shake ito araw-araw. Ilan sa mga yeast cells ay lulubog at didikit sa sahig ng bote. Kunin ang mga yeast na ito at gumawa ng bagong culture nila. I-shake ang bagong culture araw-araw at kunin ang mga mabilis dumikit sa ilalim. Ulitin ito at pagkatapos ng dalawang buwan may isang uri na ng yeast na may kakaibang ugali kaysa sa ordinaryong yeast, isang bagong nilalang. Ito ay isang halimbawa ng tinatawag na "artificial selection". Ginagawa ito ng mga agrikulturista at magsasaka sa mahabang panahon para makapagpayabong ng binhi na may kaaya-ayang ugali.

Anong klaseng yeast ba ang nabubuo sa ganitong paraan? Basahin ang buong balita dito (in English).

Original paper:
Ratcliff, Denisona, Borrelloa, & Travisanoa, Experimental evolution of multicellularity PNAS January 31, 2012